ബെംഗളൂരു: ചുട്ടുപൊള്ളുന്ന ചൂടിൽ വലഞ്ഞ ബെംഗളൂരു നഗരത്തിന് ആശ്വാസമായി ഞായറാഴ്ച വൈകുന്നേരം പലയിടങ്ങളിലും ശക്തമായ മഴയും ഇടിമിന്നലുമുണ്ടായി. കാറ്റോടും ആലിപ്പഴ വർഷത്തോടും കൂടി പെയ്ത മഴ നഗരത്തിലെ താപനില ഗണ്യമായി കുറച്ചു.
ഞായറാഴ്ച രാത്രി 8:30 വരെ ബംഗളൂരു സിറ്റിയിൽ 16.0 മിമി മഴ രേഖപ്പെടുത്തി. മാർച്ചിലെ സാധാരണ ശരാശരി മഴ 14.7 മിമി ആയിരിക്കെ, ഈ മാസം ഇതുവരെ നഗരത്തിൽ ലഭിച്ചത് 27.2 മിമി മഴയാണ്. ഇത് ശരാശരിയേക്കാൾ ഏകദേശം ഇരട്ടിയോളമാണ്.
തിങ്കളാഴ്ചയും നഗരത്തിൽ ഭാഗികമായി മേഘാവൃതമായ അന്തരീക്ഷമായിരിക്കുമെന്നും ഒന്നോ രണ്ടോ തവണ മഴയോ ഇടിമിന്നലോ ഉണ്ടാകാൻ സാധ്യതയുണ്ടെന്നും ഇന്ത്യൻ കാലാവസ്ഥാ വകുപ്പ് (IMD) പ്രവചിച്ചിരുന്നു.
മണിക്കൂറിൽ 40-50 കിലോമീറ്റർ വേഗതയിൽ വീശിയടിച്ച കാറ്റും ഇടിമിന്നലും പലയിടങ്ങളിലും ജനജീവിതത്തെ ബാധിച്ചു. ശ്രീനഗർ ബസ് സ്റ്റോപ്പിന് സമീപവും ന്യൂ തിപ്പസാന്ദ്രയിലും മരച്ചില്ലകൾ ഒടിഞ്ഞുവീണു. പലയിടങ്ങളിലും വൈദ്യുതി തടസ്സവും ഗതാഗതക്കുരുക്കും ഉണ്ടായി.
കഴിഞ്ഞ കുറച്ചു ദിവസങ്ങളായി സാധാരണയേക്കാൾ ഉയർന്ന നിലയിലായിരുന്ന താപനില മഴയോടെ നേരിയ തോതിൽ കുറഞ്ഞു. ബംഗളൂരു സിറ്റിയിലും കെംപെഗൗഡ അന്താരാഷ്ട്ര വിമാനത്താവളത്തിലും 33.6°C ആണ് പരമാവധി താപനില രേഖപ്പെടുത്തിയത്.
മറ്റു കണക്കുകൾ: കെംപെഗൗഡ അന്താരാഷ്ട്ര വിമാനത്താവളത്തിൽ ഈ മാസം ഇതുവരെ 94.4 മിമി മഴ ലഭിച്ചു. എച്ച്.എ.എൽ (HAL) എയർപോർട്ടിൽ 34°C ആണ് താപനില രേഖപ്പെടുത്തിയത്.
വൈകുന്നേരം പെട്ടെന്നുണ്ടായ മഴ വാരാന്ത്യയാത്രക്കാരെയും മറ്റും ബുദ്ധിമുട്ടിച്ചെങ്കിലും താഴ്ന്ന പ്രദേശങ്ങളിൽ ചെറിയ തോതിൽ വെള്ളക്കെട്ടുണ്ടാക്കിയത് ഒഴിച്ചാൽ മറ്റ് വലിയ നാശനഷ്ടങ്ങളൊന്നും റിപ്പോർട്ട് ചെയ്തിട്ടില്ല.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
